મહારાષ્ટ્રમાં કોંગ્રેસને વધુ એક ઝટકો, પૂર્વ મંત્રી બસવરાજ પાટીલે આપ્યું રાજીનામું

લોકસભા ચૂંટણીની જાહેરાત પહેલા મહારાષ્ટ્રમાં કોંગ્રેસને વધુ એક મોટો ઝટકો લાગ્યો છે. પૂર્વ મુખ્યમંત્રી અશોક ચવ્હાણ બાદ પૂર્વ મંત્રી બસવરાજ પાટીલે પાર્ટીમાંથી રાજીનામું આપી દીધું છે. તેઓ કોંગ્રેસના પ્રદેશ કાર્યકારી અધ્યક્ષ પણ હતા. મળતી માહિતી મુજબ તેઓ મંગળવારે ભાજપમાં જોડાઈ શકે છે. બસવરાજ પાટીલ મરાઠવાડા ક્ષેત્રમાં મોટા નેતા તરીકે ઓળખાય છે.

છેલ્લા કેટલાક દિવસોમાં મહારાષ્ટ્ર કોંગ્રેસના ઘણા વરિષ્ઠ નેતાઓએ પાર્ટી છોડી દીધી છે. જેમાં અશોક ચવ્હાણ, મિલિંદ દેવરા, બાબા સિદ્દીકીનો સમાવેશ થાય છે. અશોક ચવ્હાણ ભાજપમાં જોડાયા છે. મિલિંદ દેવરા મુખ્યમંત્રી એકનાથ શિંદેની પાર્ટી શિવસેનામાં જોડાઈ ગયા છે. આ બંને નેતાઓને રાજ્યસભાની ચૂંટણી માટે નામાંકિત કરવામાં આવ્યા છે. તેમનું રાજ્યસભાનું સભ્યપદ લગભગ નિશ્ચિત છે. બીજી તરફ બાબા સિદ્દીકી નાયબ મુખ્યમંત્રી અજિત પવારના નેતૃત્વમાં એનસીપીમાં જોડાઈ ગયા છે.

બસવરાજ પાટીલ ધારાશિવ જિલ્લાના ઉમરગા તાલુકાના મુરુમના રહેવાસી છે. તેઓ 1999ની વિધાનસભા ચૂંટણીમાં પ્રથમ વખત ચૂંટાયા હતા. તે સમયે પક્ષમાં તેમનું સારું સ્થાન હતું. એટલા માટે તેમને તે સમયે મંત્રી બનવાની તક મળી હતી. બસવરાજ પાટીલ 1999 થી 2004 સુધી મહારાષ્ટ્રના ગ્રામીણ વિકાસ મંત્રી હતા.

પરંતુ 2004ની ચૂંટણીમાં તેઓ હારી ગયા હતા. તેઓ પ્રથમ વખત ઉમરગા વિધાનસભામાંથી જીત્યા હતા. પરંતુ બાદમાં આ મતવિસ્તાર અનામત રાખવામાં આવ્યો હતો. તેથી, પાર્ટીએ તેમને 2009ની ચૂંટણીમાં ઔસા મતવિસ્તારમાંથી ઉમેદવાર બનાવ્યા. તેઓ આ ચૂંટણી જીત્યા હતા. તેમણે મોદી લહેર દરમિયાન તેમની આગામી પાંચ વર્ષની ચૂંટણી એટલે કે 2014ની વિધાનસભા ચૂંટણી પણ જીતી હતી. પરંતુ 2019ની વિધાનસભા ચૂંટણીમાં તેમનો પરાજય થયો હતો. આ પછી પાર્ટીએ તેમને પ્રદેશ કાર્યકારી અધ્યક્ષની તક આપી.